ل هەر وەلات و جهەکی ب شێوەیەکێ جودا گرنگی ب ژنێ دهێتە دان ل شنگالێ ژی ژنێ جهێ خوە یێ تایبەت هەیە و یا ئازادە د کارکرنێ دا تا رادەیەکێ ب تایبەتی پشتی فەرمانا ( سێی تەباخا دووهەزار و چاردان ) پتر گرنگی ب ژنێ و شیانێن وێ هاتییە دان و ب ئازادی ژنا ئیزدی ل ناڤا بازارێ کارکریە و دەهان نمونەیێن کچان ل بازارێ دهێن دیتن کو کاردکن و دکانێن جل و بەرگان ڤەگرینه و سالۆنین جوانکاریێ و هندەک تشتێن دی ، ئازادیا ژنێ ل جڤاکێ ئێزدی دا بۆ رەوشەنبیری و زانایا ئێزدیان ڤەدگەریت .
جیلان کەمال یەک ژوان نمونەیێن کچانە کو لناڤا بازارێ کارکری و سەرکەفتن ئانی، جیلان کچەکا تەمەن ١٩ سالە خەلکا گۆمالگەها گرزەرکە ل باشوری چیایێ شنگالێ سەرب ناحیا گرعزێر ە ، جیلان ژبۆی ئێزدی نیوز وەها بەحسێ چیرۆکا خوەکر دەمێ دەست بکار بووی: ل فەرمانا ٣ی تەباخا ٢٠١٤ێ دەمێ داعشێن هۆڤین هێریش کریە سەر شنگالێ ئەمژی وەکو هەموو خەلکێن دی ژ شنگالێ رەڤین و ئاوارەبوون بەرەڤ کوردستان و ئەم ل گوندێ سینا مان کو سەرب کومالگەها شاریا یە.
پشتی کو شنگال ژ داعش هاتیە پاقژکرن و ل سالا ٢٠١٧ێ مە بریارا ڤەگەرێ دا کو ئەم ل ناحیا سنونێ ئاکنجی ببن، بێ گومان پشتی کو ئەم ڤەگەریاین شنگال ئاستەنگیێن ژیانێ هەبوون و ژیان ب زۆری ب رێڤە دچوو و ل مالباتا مندا بتنێ بابێ من شیانێن کارکرنێ هەبوون و ئەز یا مەزنتر بووم ژ خویشک و برایێن خوە لەوما من بفەر زانی و من بریار دا ئەز ژی کاربکم لناڤا بازارێ و من ب هاریکاریا خێزانا خوە دکانەکا بچووک یا جل و بەرگێن ئافرەتان ڤەکر ل بازارێ سنونێ سەرەرای وێ چەندێ کو ئەز قوتابی بووم و گەلەک جاران راستی ئاستەنگیان دهاتم لێ ئەڤ یەک نەبوە رێگر کو کارنەکم.
پەیاما جیلانێ ژبوی کەچ و ژنان ئەوە کو بێ شەرم کاربکن و چ شەرم د کارکرنێ دا نینه و داخوازیێ ژ دایک و بابان دکەت رێ ب کچێن خوە بدن ژبوی کارکرنێ و پشتەڤانیا وان بکن و ژن ژی مل ب ملێ زەلامی کاربکن داکو بکاربن ژیانەکا خوەش بسەر ببن هەروەها داخوازیێ ژ رێکخراوێن هاریکار و چڤاکی دکەت پشتەڤانیا کچان پتر بکن و دکانێن جل و بەرگێن ژنان و سالۆنێن جوانکاریێ بۆ وان ڤەبکن و دگەلدا هاریکاربن داکو ئەم بکاربن جڤاکەکی سەرکەفتی ئاڤا بکن.
